OH SURUZZA ANEDDRI ANEDDRI 'Na vota c'eranu un maritu e 'na muglieri e avianu 'na figlia
fimmina e un masculiddru. Mischinu a ddru cristianu ci va mori la muglieri! Chiddra fimmineddra avia setti annuzzi e lu masculiddru cincu. La fimmineddra avia la parrina ca ci abbadava, ci facia li
capiddri, ci lavava la faccia, ci dava adenzia. Doppu se misi ci dissi a ddr' addreva: Tal'è, dici, dicci a
to patri si si voli maritari cu mia. -Me patri, dici, avi picca ca ci murì me matri! -Tu dicicillu lu stessu. Ddr'addreva ci dissi -Papà, dici, lu sapi, la pipina si voli
maritari cu vossia! -No, chiffà scherzi, i mancu se misi avi...! Doppu n'atra pocu di iorna arrè: Dicci a la pipina ca quannu
'mpurriscinu li stivala ca su appizzati, tannu mi maritu i! Si partì e i nni la pipina-Comu a mma fari? Ci dissi dici: -Tu ogni matina, piglia la pisciareddra di lu
rrinali, ci acchiani cu na siggiteddra e ci la ietti. Ddra picciutteddra facia ddra vita (Chi sapia ca c'avia n'cidiri
tinta ddra fattata!) Doppu 'na simana -Papà, dici, li stivala 'ncamuleru, 'mpurreru! -Veru è! Ci lu pozzu diri a la pipina? Diciccillu. Si partì e ci lu i a diri. Comu si maritaru beddri puliti, iddra avia 'na figlia vidè,
ca ci avia murutu lu maritu. Doppu maritati cuminciaru li sciarri. -I un ci vogliu cummattiri cu li to figli; va lassali- E sò patri ci dissi a l'addrevi: -Dumani, dici, a lu matinu a
mma iri a a cogliri finucchieddra. Ddr'addrevi ieru a chianciri nni la nonna ca ci dissi:
Inchitivi li sacchetti, dici, di cinniri di tannura e di caniglia e iti facennu
la viulata. E cussi ficiru! Arrivata a Petra Nivura si misiru a cogliri finucchieddri;
iva scurannu e sò patri ci dissi dici: Vatri cugliti 'cca e i ddra! (P'ascutari
la muglieri) Iddru nenti fici, si misi a lu tracoddru e piglià 'na cucuzza,
l'attaccà 'ni un pedi di mennula ca cu lu ventu facia battaria. -Lu papà stiddria li ligna!- Quannu scurà di tunnu un truvaru a nuddru e si misiru a
chianciri; cu li maniati però arrivaru a lu paisi. Chiddra ostramenti dicia a lu maritu: -Eh, -disgraziata pi
com'era- ristà un piattu di tagliarineddra! Si c'eranu ddr'addrevi si la
manciavanu! Si nni la vuli dari cca semmu! ...E si manciaru ddra
tagliarineddra. Doppu tri iorna arrè:- i un ci vogliu cummattiri...e i cussì,
e i cuddrì.. Ddr'addrevi si misiru 'n sacchetta arrè la caniglia e la
cinniri di tannura e ssi nni ieru! La notti ci chiuvì e si persiru li maniati. La cucuzza sbattia e sò patri avia spirutu....e ristaru nni
ddru voscu; si scuravanu nni 'na grutta e manciavanu erbiceddra! Ora a menti mia, un jornu di iorna lu figliu di lu Re ci
dissi a sò patri: I vogliu iri a caccia; si mi duna tri surdati mi nni vaiu a
San Giuvanni. A la punta di lu feu unn'ecchi eranu c'era ddra grutta e
vannu a bbidinu ddri picciutteddri chi cuglianu finucchieddri. Ddr'addrevi avia
assà ca un vidianu cristiani e s'ammucciaru. Arriva lu Riuzzu, s'abbicina davanti la grutta e dissi: -Si
siti carni umana affacciati cca.- Arrispunneru: -Semmu carni Battezzata. -Facitivi la Cruci!- E si la ficiru... Ma ddra picciutteddra, c'avia dudicianni un potti affacciari
c'avia la bbriogna di fora. Lu Riuzzu si livà la mantillina c'avia e la detti a ddra
picciutteddra e si li purtaru a la Reggia. La Reginotta taliava cu lu cannocchiali.- Ddra cchiossà su!- Arrivata davanti lu cancellu, l'impiegati (ca chissi n'annu
superchiu!), graperu. -Di quattru ca eranu, ca se sunnu.- A la Reginotta ci dissi: -chissa è la me zita- E ci cuntà la
fattata. -A ccu apparteni? Natri ittammu lu bbannu e cu avi cuscienza si la veni a
leggittima! -Cu voli canusciri a un masculiddru e 'na fimmineddra, ca
chista s'ava maritari cu lu figliu di lu Re! Chiddra buttanazza di la parrastra dissi a lu maritu: Chissi
li to figli sunnu!. Si parteru e ci ieru. -Quantu si fici beddra! (Ca la canuscì) Si chiamà la Reginotta di cantecchiu e ci dissi ca ci avia a
dari a sò figlia pi nora, ca chissa un si sapia nè cu era, nè a cu appartinia!. -N'aiu una ca biddrizzi n'avi superchiu. La Reginotta ci dissi: -I di eesiri un mogliu, ca un sacciu
di cu iè figlia! -Ci pozzu dari a me figlia, chi nni dici? Però cu lu velu
davanti...Iddru l'ava scummigliari quannu si vannu a curcanu!- Bonu iè, bonu iè! Eranu tutti cosi pronti, li mmitati, la tavula stisa. Allura ddra parrastra i nni la stanza, ca era 'nfacci lu
mari, unni era affacciata ddra picciutteddra e la ittà a mari. Ddr'addrevu, c'avia li curniceddra d'oru, era nni la stanza
unn'ecchi scannavanu l'armala e vitti tutti cosi e si misi a gridari. Chiddra
chi s'avia a maritari cu lu Riuzzu si livà lu velu di davanti e si misi a
gridari dicennu c'avia statu iddru a gracciarici la faccia. (Ammeci unn'era veru! iddra era tutta mascariata e avia la
mascara tutta futtuta propria, ca era lasda). Ddr'addrevu si misi a diri: -Oh suruzza aneddri aneddri pi mmia si scasda l'acqua e s'ammolanu li cuteddra! (L'avianu a mettiri 'nni la casdara) Arrispunnia la soru di 'n mezzu lu mari: Oh fratuzzu abbannuni i sugnu mmucca di lu piscicani! (si un era ora, a n'atra tanticchia si la manciava) Lu 'ntisi un piscaturi e la ià tirari fora e si nni ieru a la
Reggia. Dd'addreva ci cuntà tutti cosi a la Reginotta ca ci
raccumannà di un diri nenti. Piggliaru la figlia di la parrasta, la scannaru beddra pulita
e la Reginotta ci dissi a sò mà: -Gnà Marì, chiffà la vuliti spenniri la pasta e la carni a li
vicini? Ci priparà tutti cosi e la testa di la figlia : -Tinì, iti a spenniri li
cosi a la fasda! Ma quannu vitti la testa di la figlia si misi a gridari! Ci dissi la Reginotta: -Ora spinniti chista, ca chiddra sa va
maritari cu lu Riuzzu! Perciò: Lu cuntu è lestu, lu cuntu e finutu, un s'acciu si a vatri v'a piaciutu! Favola ditta favola scritta, diciti la vostra ca la mia è ditta! |