LA BELLA DI  SETTI VELI

'Na vota c'eranu un patri e 'na matri e avianu tri figli; la mamma murì e ristà so' patri.
Sò patri ci dissi a li figli: Tal'è, sintiti ca mma fari: -du eranu picurara e ci lassà li pecuri, a chiddru nicu ci lassà 'na vardeddra e 'na jumenta lenta.
Chistu i nna li frati, doppu ca murì so' pà: Ma ta ddari tecchia di ricotta, dici.
N'avisti 'bbidienza a lu papà? T'è munci munci, dici 'un ti nni dammu!
Ddru mischinu si nni i mortu di fami e i nna un picuraru ca era ddra vicinu ca ci dissi: Eh fratellu, dici, viniti cca, manciati. Chiddru ci detti 'na vasceddra di ricotta e ci detti un pani a ddru picciottu, ca si chiamava Pippinu; ci detti tanti cosi.
Vidica, dici, è la furtuna tò, -ddra juminteddra ci parlà-, vidica dici ora t'ava nasci un putru!
A chi è, di 'ssa jumenta vacanti m'ava nasci un putru?
Cchiù  agghiri ddra si curcà la jumenta e ci nascì un putru.
Comu cci nascì ddru putru, pigliani e ddra jumenta ci dissi: Vidica, dici, li to frati ti vonnu 'nculari!
Si partì ddru babbu e i nni li frati: A voglia ca un mi dastivu ricotta, Pè munci, munci! Tal'è la jumenta mi fici un cavaddruzzu!
E li frati: Ora, dici, ammà iri nna lu Re e ci 'amma diri ca Peppi si fida pigliari lu cavaddru sirbaggiu di lu feu, ca accussì mori e nni lu livammu di davanzi l'occhi!
Piglià e cci ieru. Maistà, dici, me frati si fida piglià lu cavaddru sirbaggiu di lu feu!
Ma veru?
Veru!
Pippinu!
Pronti.
'Stu Pippini, malidittu un n'ecchi era: Comu m'è fidà piglià 'stu cavaddru sirbaggiu?
Piglia e ssi nni i a chianciri nni ddru cavaddru: Un ti scantari!
T'ha fari dari, dici, un furcuni di ferru di setti metri, un chissu di vitru quantu tia, da 'sta bbanna a ddra banna tu  ti 'mpili ddra intra, ca lu cavaddru, quantu vidi, dici, la luci, ca lu vitru fa accussì, veni a trozza; tu dici l'aggrampi, ci accravacchi e i chi cafuddru pi l'ammiddrari.
Allura si parterru e si nni ieru. Comu si nni ieru arrivaru ddra. Ddru cavaddru comu vitti ddra lucerna -signù nniscanza-, piglia e va trozza; iddru l'aggrampa pi li cerri, a ddru cavaddru, c'avia la grigna cchiu longa di li pedi d'iddru, e cumencia; ddru cavaddru 'ngarziddruna e chiddru cafuddrava, tumpiti tampiti, 'nzina ca l'ammiddraru. L'ammiddraru e ci misiru la vardedra e si nni ieru.
Comu si nni ieru, arrivaru nni lu Re ca ci dissi dici: Pippinu tè cincucent'unzi.
E va nna li frati: Avoglia, dici, ca mi faciti 'nfamità: talè munci munci: cincucent'unzi mi detti lu Re!
Ora ci 'amma diri ca avà gghi a pigliari la cutra a lu ddragu, tutta ciancianeddri d'oru, accussì lu ddragu si lu mancia e un c'è bisognu d'arriturnari.
Allura si nni i a chianciri nni lu cavaddru: Dici chi ha Pippinu?
A che d'aviri ca la Regina s'avà maritari e voli la cutra ciancianeddri d'oru di lu vecchiu ddragu! 'Un mi mancia lu ddragu!?
Tal'è ca ffari: t'ha ffari dari quattru tummina di ciciri, t'ha fari dari un ferru di setti  metri cu lu croccu e un sirraculu, dici, e un t'ha fari dari nenti cchiù.
Comu cci dissi accussì ci dissi dici: Maestà ma va dari dici quattru tummina di ciciri, un ferru  cu lu croccu e un sirraculu; e ssi nni  ieru.
Comu si nni ieru, cumencia a ittari ciciri; lu vecchiu ddrau e la vechia ddraa: Ah li grannuli li grannuli! -Ci paria ca eranu grannuli-
Si strincianu, si vasavanu lu vecchiu ddrau e la vechia ddraa; iddru sirrà ddru tettu, piglià ddru croccu e ci piglia la cutra!
Comu ci porta la cutra la Reginotta si i a maritari cu la cutra ciancianeddri d'oru e ciancianeddri d'argentu. E ci detti natri cincucent'unzi lu Re.
Eh, a voglia ca mi faciti 'nfamità, sdisanurati, cci nni voli munciri; munci munci, - smaccava li frati-.
Quannu vittiru lu frati, dici, ma un nnè bonu ca ora, dici, ca ci dicemmu ca avà piglià la Bella di setti veli addrà bbanna lu  mari, accussì mori e nni lu livammu di davanzi l'occhi.
Maistà, dici, me frati si fida i a pigliari la Bella di setti veli addrà bbanna lu mari.
Ma veru?
Veru!
Allura si  partì Pippinu. Ddru mischinu si misi a chianci nni ddru cavaddruzzu.
A chi ha?
Ah, dici, comu è fari ca la Bella di setti velira è addra bbanna lu mari, dici, ca la voli lu  Reginottu!
Ah, un ti scantari, dici: t'ha fari dari un quattru tummina di pani, un xiascu di vinu, quattru chila di carni, 'na seddra tutta d'oru e 'u ggliommaru di lana; e po' 'u' dubitari.
Allura a lu Re ci dissi dici: Vogliu 'na seddra tutta ciancianeddri d'oru, -ddra seddra sa chi seddra era!-.
'Stu picciottu si nni i. Arrivata nni 'na chianura lu cavaddru ci dissi: Scinni Pippinu, vidi quantu frummiculi c'è, minuzzacci 'ssu pani ca chissi un jornu 'annà dà la vita a tia.
Ci  lu minuzzà e caccià. Cchiù addriri ddra vitti n'aquia chi stava murennu: Scinni Pippinu dunaci 'ssa carni a s'aquia, ca chissa un jornu avà dà la vita a tia.
E scinnì; arrivata a lu mari trova lu re di tutti li pisci ca stava murennu -ca un n'avia manciari-. Dici: Scinni Pippinu, dacci lu pani a suppa ca chissu un jornu avà dà la vita a tia.
Scinnì, ci fici lu pani a suppa e lu ittà intra lu mari.
Comu passà addrà bbanna lu mari c'era la criata ddra, cu li liuna: vinti liuna chi guardavanu la Bella di setti veli.
Si fici dari un ggliommaru di lana, comu lu ittà pecuri n'affacciaru n'achiddra -Quantu pecuri affacciaru!- Li liuna si nni ieru pi li pecuri e la Bella di setti veli (ca era la Reginotta) la lassaru sula.
Comu la lassaru sula, trasi lu cavaddru ddra, tuttu paratu cu la seddra d'oru: comu arrivaru ddra ca era paratu cu la seddra d'oru, pigliani la Reginotta: C'eccravaccari ini.
No dici la criata, c'eccravaccari i!
No no, c'eccravaccari ini dici la Reginotta  e vincì la Reginotta -ca era la Bella di setti veli-.
Accravaccà, passà- lu mari e -figlia di buttiglia- piglià l'aneddru e lu ittà intra lu mari; e passaru.
Arrivaru nni lu voscu, piglia lu velu e lu ittà.
Comu arrivà ddrani dici: Bba, nni putemmu maritari. -Dru Reginottu cu la Bella di setti veli-.
Maritari? dici? Primu 'amma miscari n'apocu di frummentu e cu l'annetta si piglia a mia. (Lu Reginottu o Pippinu)
Comu 'amma fari dissi Pippinu; e ssi nni i a chianciri nni lu cavaddru.
A chi ha Pippinu?
A che d'aviri, ca chiddra ddra ammiscà frumentu, linticchi, fravecchi, tutti cosi 'nzemmula!
U' dubitari dici. Iemmu a pigliari dici du visazzi di frummiculi. Comu ieru a pigliari du visazzi di frummiculi: Cumannu cumannu, tutti ognunu a lu sò postu!
Lu nnumani matinu: Nni putemmu maritari!
Maritari? Primu dici 'amma iri a pigliari lu velu chi mi cascà nna lu voscu.
E  si nni i a chianciri ni lu cavaddru.
Ddru cavaddru ci dissi: Curri Pippinu e va piglialu! un ti scantari,  e parteru.
Arrivata nni lu voscu dissi : Oh aquia  chi detti la vita a tia?
Chibbò? dici
Duna la vita a mia!
Lu sa, all'atru jornu passammu cu la Bella di setti vedi e ci cascà lu velu.
Appuntu, dici, l'haiu nni lu me nidu, ca li me figli, dici, l'hannu tuttu cacatu!
O cacatu o senza cacatu nni l'ha dari; e ci lu purtani.
Comu  ci lu purtà, allura a 'sta picciotta ci dissi: Nna mma maritari.
Nna mma marirati? Maritari, dici? Prima a iri a pigliari l'aneddru chi nni cascà nmezzu lu mari.
Pippinu curri va piglia l'aneddru?
Comu l'è truvà l'aneddru?
Si nni i a chianci nni lu cavvaddru; lu cavaddru ci dissi un ti scantari; ddru pisci chi ci dasti tu lu pani a suppa dici, ora videmmu.
Arrivanu a lu mari. Comu arrivanu a lu mari "O re di tutti li pisci, chiddru chi detti la vita a tia, duna la vita a mia"
"O re di tutti li pisci chiddru chi detti la vita a tia, duna la vita a mia"
A chi bbo Pippinu? ci dissi un pisci.
A che d'aviri ca lu jornu ca passammu di cca a la Bella di setti veli ci cadì l'aneddru.
No dici lu ittà iddra, no ca cci cadì, lu ittà iddra! Appuntu l'havi lu re di tutti li pisci.
Si lu re di tutti li pisci dici dormi, vivu tu e i vidè: si lu re è viglianti mortu tu e i vidè!
Arriva ddrani, lu re durmia, ci tirà l'aneddru e ssi nni i.
Ci lu porta ddr'aneddru  ci dissi dici : Ora nni maritammu!
Nni maritammu? Maritarini? Prima avanti ca nni maritammu ha xamiari un furnu setti iorna e setti notti, e ti ci ha 'mpilari setti viaggia: cu resta vivu, o tu o Pippinu mi lu pigliu pi maritu, ci dissi la Bella di setti veli.
Comu arrivà ddra si nni i a chianciri nni lu cavaddru: Curri Pippinu e va 'mpilaticci.
Comu mi cce 'mpilari?
Lu cavaddru ci dissi: Un ti scantari, dici vidica ora è muriri i.
Comu ha muriri tu?
E' muriri i ca la fini mia è chista!
Talè, lu cori miu lu pigli, lu metti n'un pignateddru e tu t'unti e quannu veni lu Re ci ha diri ca t'untasti lardu vecchiu di trent'anni e di vint'anni.
Comu Pippinu s'untà: Chistu è miu, chistu è di lu Re, chisttu è di Reginotta, e niscì setti viaggia di lu furnu!
Comu niscì setti viaggia d'intra ddru furmu, ristà vivu; comu ristà vivu: Senti Pippinu dici, ci dissi lu Reginottu, chi ti cci stricasti?
Mi ci stricavu lardu vecchiu di trent'anni e di vint'anni.
"Cu havi l'ardu vecchiu di trent'anni e di vint'anni lu purtassi 'n palazzu riali ca ci lu paganu quantu quantu!"
S'untà lu Riuzzu, comu arrivà davanti ddra carcara, s'abbruscià e murì.

E Pippinu si marità cu la Reginotta.
Comu si marità cu la Reginotta, ca era la Bella di setti veli, quantu genti chi ci ieru, quantu a farici onuri.
Li frati d'iddru: Ma iemmuci vidè, iemmucci a fari onuri.
Quantu regnanti, quantu cchini!
La povera di mia mi truvavu ddrani, axxiavu du tarì: unu lu persi e n'atru mi cadì.
Lu cuntu è lestu lu cuntu è finutu,
un sacciu si a vatri v'ha piaciutu!
Favola ditta favola scritta,
cuntati la vostra ca la mia è ditta.
Lu fumu c'acchianava di la ciminia
tutti cosi passaru di 'n manu a mia...