'Na vota c'era un commercianti ed avia tri figli fimmini.

Allura 'stu commercianti iva a fari robba luntanu e ogni se misi quannu vinia a la figlia ranni e a chiddra mizzana ci purtava lu rigalu, a chiddra nica un ci purtava nenti.

Quannu chiddra un nni potti cchiù, 'na matina sò patri si nni stava iennu a Palermu, lu chiamà nna la scala: Papà vogliu fatta 'na grazia.

Chi grazia vo?

A li me soru ci ha purtatu sempri regali, abbiti, scarpi, e a mia nenti mà. I vogliu ca mi porta la fotografia (anacrinismo ritratto) di lu Riuzzu.

Ti sia concessa figlia mia, comu vegnu arrè, dici, ti la portu.

A li se misi s'arricampà sò patri e la chiamà iusu: Pippineddra, Pippineddra, cca c'è 'nzocu disidiravatu tu.

Ddra picciuteddra pigglià ddra cascittineddra e ssi la ià ssarbari sutta lu lettu. Li soru, mmidiusi, si mmurmuruavanu: Com'è, dici, ca lu papà 'un nni purtà nenti e a iddra si?

L'ammà scravunchiari 'nzoccu cci detti.

La matina sò mà li chiamà pi iri a la missa: La missa sona, susitivi!

A mia mi doli lu stomacu, ci va vossia cu me soru -ci dissi una- e l'atra: I mi movu ca cci fazzu tecchia d'acqua cu l'addragaru.

Appena si nni ieru la mamma e la figlia a la missa, chiddri si misiru a circari e ci truvaru ddra cascittineddra e ci la pistaru tutta cu li pedi.

Siccomu ddru Riuzzu era 'nfatatu, cumincià a rancurarisi.

Rancura di cca, rancura di ddra Pippineddra a la chiesa un putia stari e ssi nni vozzi iri intra.

Appena Pippineddra misi li chiavi a la porta sintì lu rancuru: Uh, Uh! e dissi Tradimentu! Tradimentu! chissi foru ddri tappinari di li me soru!

Riì la cutra di lu littinu e truvà ddru ritrattu tuttu scavazzatu, lu piglià e dissi: Mi nn'è iri a diu e la vintura.

Versu li quattru si partì e i nni un sartu e si fici affittari un vistitu e u' cappeddru e lu pagà ducent'unzi; pò si fici dari un cavaddru, si purtà 'na trusciddra e partì a diu e la vintura!

Camina ca ti camina, vistutu di masculu, 'ncuntrà un picuraru e lu cummincì a fari canciu cu li robbi.

Si vistì di picuraru e arrivà 'n'un voscu; stava scurannu e si nn'acchianà nni n'arbiru. Mischina cci stava 'mpincennu lu sonnu, quannu vitti s'arricamparu centinara di liuna; si manciaru ddru cavaddru e du si mossiru sutta ddr'arbiru pi bidiri si c'era xiauru di carni umana.

A Pippineddra cci trimava lu piddrizzuni! Ora si mi vidinu mi mancianu!

Ddri liuna chiacchiariavanu: N'avutu sintura, dici, tu ca ha caminatu, di lu Re Fiorello?

Lu Re Fiorellu s'un mori oi, mori dumani, ca detti 'na fotografia a un commercianti ca la purtà a la figlia ca era signurina e cci la scacciaru li soru cu li pedi!

Chi cci vulissi pi stari bbonu?

Ci vulissiru du 'nzunza di liuna, misi n'un pignateddru senza 'ncignatu e si squaglianu: cchiù chi si va untannu, cchiù beddru addiventa.

Cci 'mpincì lu sonnu e s'addrummisceru!

Pippineddra sintì ddru discursu, scinnì e cci detti 'na spatata l'unu nni lu coddru e l'ammazzà e s'innacchianà arrè.

A l'altezza di du omini di suli, scinnì cci tirà li 'nzunzi e ssi nni i.

Camina ca ti camina, 'ncuntrà 'na vecchia e ci dissi: Oh bona vecchia mi nni dassi sintura di lu Re Fiorello?

S'un mori oi, mori dumani!

Mi dicissi unnni sta? E dissi ca era medicu sirbaggiu.

Ci 'nzignà unni stava e la ficiru trasiri.

E ci dissi a la Reginotta: Vogliu fattu un piaciri, m'ava dda un pignatedru senza 'ncignatu e vogliu tri iorna di tempu.

La Reginotta ci priparà lu pignateddru e Pippineddra trasì nni la stanza di lu Riuzzu, pi staricci tri iorna.

Si misi a stricari e a li tri iorna guarì lu figliu.

Vulianu ricompenzari a ddru medicu e lu ficiru stari ddra pi se misi, comu trancituri di tavula.

Ogni jornu lu Riuzzu guaritu e Pippineddra -vistutu di masculu- iucavanu a iri currennu, a cicireddru...

A sò mà ci dissi: A mia mi fa la 'mpressioni ca è fimmina.

E lu misi a la prova. Lu purtà n'un negoziu, ma chiddra si sciglì cosi d'omini.

Pò la vozzi mettiri arrè a la prova e la Reginotta dissi: Me figliu sta 'nfuddrennu pi iddru ca cci pari fimmina. Avà pisciari nni 'n'aglialoru. Pippineddra però fici un mutu cu la carta e piscià!

Lu Riuzzu si rassignà, ma cci dicia sempri:

Quannu un nni potti cchiù Pippineddra chiama a la Reginotta e ci fici pigliari li megliu abbiti c'avia e cci fici la sorpresa a lu Riuzzu!

Subbitu ittaru lu bannu ca s'avianu a maritari.

Li soru lu 'ntisiru e ieru a lu matrimoniu senza farisi vidiri.

Appena vittiru ca era sò soru mureru di la mmidia!

Chi bbuliti ddrocu nni spinneru cosi, fina ca spinneru du tarì: unu lu persi, l'atru mi cadì!