MAZZARUCCHEDDRU MIU A LI TESTI TESTI
 

Na mamma avia tri figli masculi; comu avia 'ssi tri figli masculi, unu si chiamava Ninu, unu  Peppi e l'atru Luvici: Luvici era spertu assà!
Ddri frati  ivanu a ligna.
Sò matri ci dissi: Cu porta, dici, li primi ligna, ci dugnu lu cuddruruni biancu.
Com'accussì a Luvici l'attaccaru 'n'un pedi di mennula, iddru si carricà ddru pedi di mennula, e lu purtà davanti la casa e sò ma' ci detti lu cuddruruni biancu e l'atri manciavanu  muffuletti!
Buttana di la maiddra! A sempi iddru si li futti li cuddruruna bianchi, dumani l'ammà ttaccà a 'na xarrubba.
Lu nnumani l'attaccaru a 'na xarrubba; chiddru si carricà ddra xarrubba e la purtà davanti la porta, arrivata ddra davanti nun putia passari!
Ora sa ca mma ffari? -li frati- Ora lu iemmu a ittari di 'na muntagna: iddru dici si mancia li cuddruruna bianchi e n'atri la muffuletta!
Allura piglia e lu ieru a ittari nni 'na muntagna.
Oh ca m'allavancu, oh ca mi sdirrupu! E ci affaccia San Giseppi.
A chi a Luvici?
Che d'aviri!
Te' 'ssa tuvaglia. Quannu dici "Cumannu Cumannu" veni pasta, veni vinu, veni tutti cosi.
Quann' è cussì: Cumannu Cummannu... e ci affaccià la pasta veru e lu vinu!
Allura arriva a lu paisi e sò ma' un c'era ca iva a dari lu pani a la ggenti, e c'era 'na vicina c'avia la figlia zita: Luvici, dici.
Chi bboli?
Talè dici, venitinni cca, ca cca abballammu, sunammu, facemmu, tale veni cca.
Vah, a ta manciari? -ddru babbu di Luvici-
E a manciammu!
Cumannu Cumannu...tutta pasti e carni
Quannu chiddri si saziaru, ci canciaru la tuvaglia, e lu mannaru.
Arrivata nni sò mà: Mà a ta manciari?
C' 'amma manciari?
Ora Cumannu Cumannu... -ma c'avia a cumannà ca la tuvagliedra ci la canciaru!
E un ci affaccià nenti.
Li frati arrè mazzati  e si nni i a la muntagna.
Chi ha?
Li me frati m'assicutaru a mazzati.
Te, dici, su friscalitteddru dici, comu soni abballanu tutti; tilolololo, tilololò.
A la sira: Luvici veni cca ca to mà ora veni.
Ddru babbu... tilololò, tilololò... Abballaru tutti.
Comu abballaru tutti i nni sò mà: Senti ma chiffa a ta bballari... Ma ci l'avianu canciatu!
Arrè mazzati li frati, arrè a la muntagna.Vitti quattru latri ca si stavanu spartennu li sordi, iddru si carrica 'na sacchina di ddri sordi e ssi nni i!
Ddra cristiana arrè a la finestra, dici, Luvici chi porti? E arrè la stessa sunata; ci canciaru la sacchina e ci misiru li cuti. Quannu arriva: Ma haiu li sordi!
Ddri sordi eranu cuti! L'assicutaru arrè li frati e ssi nni i arrè a la muntagna.
Affaccià San Giseppi e ci dissi: Vidica l'havi la zza Ancilina tutti cosi: lu friscalitteddru, la tuvaglia, li sordi!
Te 'ssu mazzaruccheddru miu, basta ca dici Mazzaruccheddru miu a li testi testi...Si mmà ti dunanu tutti cosi un ti nni iri.
Allura si nni ini ddra.
Ddra cristiana: Veni cca Luvici.
Allura Luvici: Mazzaruccheddru miu a li testi testi!
Datimi la tuvaglia!
Mazzaruccheddru miu a li testi testi.
Datimi lu friscalitteddru..Ahi ahi ahi!
Mazzaruccheddru miu a li testi testi. Datimi li sordi. Ahi ahi ahi!
E ci ieru a pigliari li sordi.
Quannu arrivà ddra: Ma a ta manciari; quannu presentà carni pasta, Arraggiuni avia! Si sazziaru tutti.
Luvici si piglia lu mazzaruccheddru e a li frati: Mazzaruccheddru miu a li testi testi e ammazzà li sò frati e li i a ittari a mari!
E ristaru mamma e figliu!
Idri ristaru filici e cuntenti e n'atri ccà senza fari nenti!
Lu cuntu è lestu lu cuntu è finutu,
un sacciu si a vatri v'ha piaciutu!
Favola ditta favola scritta,
cuntati la vostra ca la mia è ditta.
Lu fumu c'acchianava di la ciminia
tutti cosi passaru di 'n manu a mia...
PORCU O TROIA ?!
Allura c'era un patri ca avia un figliu masculu.
Comu avia 'ssu figliu masculu pigliani ci murì sò pà e ci lassà un purciddruzzu.
Sò mà mischina ca un'avia nè caniglia nè nenti, ci dissi: Talè dici va e pascilu ddrocu a la Madonna, dici, ca sparagnammu tecca di caniglia!
Ci i ddru picciutteddru e lu vitti padri Favianu.
Com'accussini pigliani e ci dissi: Attì mi l'a binni 'ssa troia?
A s'è porcu!
A s'è troia!
A s'è porcu!
A s'è troia!
Si luttavanu cu ddru picciottu.
Piglia ci dissi a tri, dici, A t'à diri ca è troia.
Attì, vidica troia è.
Vitti a n'atru -Cumpà un'è troia chissa?
Troia è. E vincì.
Vitti a natru.... E lu vincì ddru porcu.
Comu lu vincìni: Ma patri Flavianu mi vincì lu porcu; ora l'è iè mazzari! dici M'è vesti di fimmina e l'è iè mazzari!
Allura meru a 'st'ura si  nni e ssi nni i a l'artaru maggiuri.
A l'artaru maggiuri, cchiu notti ca stava scurannu trasi un monacu: Signurina signurina -ci paria fimmina- signurina, si nni issi ca ccani scurà .
Nonzi o beddra matri comu iè fari ca sugnu di l'art'Italia.
Cu lu sapi ora chiu lu violu!
Mi facissi curcà cu lu patri Favianu.
Allura ci i: Patri Favianu, chiffà si ci avà curcari ca c'è na signuraina?
E bbonu è. -chiddru ammumentu ci grapì li porti, ci paria ca era fimmina, comu ci grapì li porti chiddru tirà lu nerbu e cumencia a ddari nirbati.
Allura chiddri li monaci: Ddra signurina lu 'sta ammazzannu, ddru sdisgraziatu di parrinu, l'ha 'sta ammazzannu!
Ddru picciottu cci dissi dici: O mi dati quattrucentumilaliri, viditica sugnu chiddru di lu porcu, neca  vi parica sugnu fimmina!
Ci detti quattrucentumilaliri e ssi nni ini.
Arrivà nni sò mà: Ma, dici, dumani mi vestu di dutturi ca cci gracciavu tutti li rini, ci misi lu sali dici e abbrusciava ca bisogna vidiri comu ittava vuci chiddru.
Allura si partini e cci i arrè: Ci n'è malateddri ccani?
Oh c'è patri Favianu mischinu di muriri ieni.
E dici facitimillu vidi ca sugnu specialista di Roma.
Allura chiddru ci i dici: Patri Favià c'è un specialista di Roma chiffà si voli visitari?
Ah macari, macari! -Unni lu vitti ca eranu li mazzati, chiddratru babbu vidè.
Allura piglià e si fici  visitari.
Viditica si lu malatu ietta vuci va a lu megliu, si li malatu un jetta fuci è di muriri.
Chiddru si misi a grattari e mettiri sali; chiddru ittava vuci mischinu comu un muteddru. Lu malatu a lu megliu va. Lu malatu a lu megliu va!
Ma chiddru era tutti grattatu!
Datimi natri quattrucentumilaliri ca i sugnu chiddru lu porcu.
Ci detti quattrucentumilaliri  e si nni i
A patri Favianu com'è?
Ah  ca la sazizza nni la manciammu nzemmula e li mazzati l'appi i sulu.
E dici vossia ci l'arrubba lu porcu n'eca ci l'arrubbammu natri -E veramenti la cosa era giusta-
Vossia ci i arrubbarici lu porcu ddr'addrevu arraggiuni avia.
'Nzumma 'sti monaci davanu a tortu a patri Favianu.
Ora chistu, lu nnumani si vesti di peddri e cci i arrè: Dici unn'è patri Favianu ca mi vulissi cumpissari.
Ih patri Favianu- lu cunpessu i- di muriti iè.
Nonzi i li  piccati l'è diri a lu patri Favianu, a bossia un cci nni dicu.
Sa li dici a mmia i l'assorbu; chiddru cci dicia.
Nonzi assa talè, sa mi lu va abbidi ca i sugnu medicu erbariu  -ca era tuttu vistutu di peddri, la coppula di pedri tutti cosi.
Quantu siti li monaci cca intra? dici. Cincu.
Tu va a Cianciana - a piglià li midicini-, tu va a Bivona,  tu va San Mrasi, tu va a Santu Stefanu, e tu ti movi pi purtuneri pi cu veni e cu un meni
Allura chistu trasi ddra intra, accura trasi o mi dati quattrucentumilaliri a sinnò  v'ammazzu. I sugnu chiddru di lu porcu.
O beddra matri, O beddra matri!
Ddru mischinu riì lu matarazzu ci piglià ddri quattrucentumilaliri  e ssi nni i.
Quannu vinniru dddri monaci dici:Unn'è?
A chiddru di lu porcu iera! A chiddru di lu porcu iera!
La sazizza nni l'ha manciammu 'nzemmula e li mazzati l'appi i sulu!
La sazizza nni l'ha manciammu 'nzemmula e li mazzati l'appi i sulu!
Dici. Ma comu a mma fa? Comu amm'ha ffa?
Tal'è pigliati 'na sarma di frummentu, centu litra di vinu e du decalatri d'ogliu e ci li purtati, abbastica un meni cchiù ccà.
Iddru sapia c'avianu a bbiniri. e ci dissi a sso mà: Mà vistemmu na pupa e appizzammula a ssu tettu, sa tal'è a la Purtedra su junti; avanti ca su iunti cca natri la vistemmu 'ssa pupa! Visteru la pupa cu li  scarpi tutti cosi e l'appizzaru a lu tettu. Chiuvia forti piglia chiddru ci dissi Eh dici Fratello!
Trasiti cu tutti li muli -ca la porta era ranni -com'è ddrocu nni tia, jusu- e traseru cu tutti li muli.
Ca dici patri Favianu mann'à tutti 'sti cosi abbastica un ni lu ncuieti cchiù!
I a nuddru dici 'ncuietu cchiù! dici. Acchianati ca manciammu, ca me matri fici tecchia di carni ca manciammu.
Allura mentri manciavanu  ci dicia: A viviti, viviti.
Unu si misi a viviri cussì -rii la teste- ah!!
A picchì ti scanti? Oh beddra matri chi è chista?
Chista, dici, mia nonna, Mi piscià lu lettu e l'appizzavu a lu tettu!
Misca dici a natri dici si ci cacammu lu lettu comu a mma fà?
Lu vinu ci detti alluppinatu!
Cu si ittava di cca, cu si ittava di ddra, a mumentu s'addrummisceru.
S'addrummisceru e a sò mà ci dissi dici: Cucemmu 'na cucuzza di nmernu, ci la mintemmu 'nculu, bella fridda e dici li facemmu scgriddrari dici.
Allura ci cucì la cucuzza bella fridda, ci calaru li cazi, ci la misiru, quannu unu s'addriviglià: Oh beddra matri mi cacavu, susiti susiti ca mi cacavu, susiti mannò a lu tettu n'appizza!
E sdettiru, 'n cazi di tila, senza scarpi, senza nenti e si nni ieru a lu cummentu.
Arrivata a lu cummentu: Ah patri Favianu, dici, vossia appi li mazzati e natri tutti li cazi cacati avemmu! Comu cacati? Chiddru a sò nanna appizzà a lu tettu e camadora fussimu ddra!
E po gridava, dici: Abbonu unu muvitivi -chiddru nni gridava- unu, muvitivi! Oh beddra matri comu amma fà!
Lu nnumani matinu a jornu piglià chistu cci i a lassà ddri vestii a lu cummentu,  comu chistu cci purtà li vestii, i dissi: Cci vaiu vidè! Axiavu un tarì unu lu persi l'atru mi cadì!

Lu cuntu è lestu lu cuntu è finutu, un sacciu si a vatri v'ha piaciutu!