Li misi nni la bbalici e vanniavanu; unu: Sperverini di sita! e l'atru: Fittucci!

Allura si 'ncuntraru e unu ci dissi: Cumpà amma cancià?

Chiddru cu lu lippu iva carricatu, l'atru cu li pampini iva leggiu.

E, dici, canciammu cumpà. E canciaru. Quannu chiddru s'innaddunà: E figliu di buttana, chi mi detti dici pampini di canni?!

Quannu l'atru si nn'adduna ca unn'eranu sperverini di sita: E figliu di buttiglia chi mi detti lippu di bbrivatura?

Cumpà ccomu vi chiamati: Cumpari Mmroglia.

E bu? Cumpari Sbroglia.

A no ca semmu tutti du boni?! Capiti ca nn'ha mma fari cumpari. Comu si ficiru cumpari dici: Allura a mma caminà 'nzemmula; e ittaru ddri bbalici; camina di cca camina di ddra si nni ieru a Roma; a Roma si nni ieru addruarisi: unu sapia cusi scarpi e unu nenti.

Unu dici mmi vaiu manuali nni lu re -cumpari Mmoglia-, cumpari Sbroglia cusia scarpi, cci ntuppà e ssi marità.

Cumpari Mmroglia facia lu manuvali 'nna lu Re e fabbricaru 'na casa ca cci avianu di mettiri sordi e iddru lassà un pirtusu: Cussì li vegnu arrobbu li sordi, dici.

Li mastri eranu appattati e ci fici un ppirtusu pi quantu trasia e niscia iddru.

Lu Re livà di fari ddri sordi; iddru appena sappi ca livà di fari tutti ddri sordi dissi: Ora ci vaiu e li vaiu arrobbu, e n'inchì 'na sacchina.

E i nni lu cumpari: Cumpà talè quantu sordi, mittiti 'ssa sacchina ddrocu.

C umpà i c'e gghiri, duman'arsira.

No no, c'è trasiri i!

No no c'è trasiri i!

Chiddru lu Re spertu misi 'na casdara di pici sutta ddru pirtusiddru: Cu veni dici av'à ristari cca!

Comu trasì cumpari Mmroglià s'ardì e murì. Lu Re ci fici tagliari la testa e la ittaru a mari.

A lu nnumani cci lu i a di a la cummari: Cummà vostru maritu murì?!

Comu murì me maritu!

Zittitivi cummari senza diri nenti; -mischinu dicennu ca murì la muglieri si pigliava colari!

Allura lu Re dici: Ora lu purtammu a la chiesa e la famiglia l'ha va i a canusci cu iè e cu nun è.

Cumpà a la missa è iri?!

No no cummà un ci ha t'ha iri.

No no cumpà c'è iri

No no cummà, mi cunzumati!

Ora buttana di la maiddra, dici:, ora vaiu a levu chiddru mortu di ddra: comu è fari cu chista figlia di cani buttana, chista avi tuttu lu jornu chi mi fa dispirari; comu iè fari?

Allura lu Re pi ddra iurnata 'un ni la misi a la missa: piglià e dissi: Ora cu avi li sordi mii, la carni di vaccina l'ha mmma mettiri a ducent'unzi lu chilu; cu avi li sordi mii si l'ha va i accattari!

E chiddra: Cumpà la carni vogliu! La carni di vaccina vogliu!

A comu c'è iri accattà la carni di vaccina allura mi 'ncaglianu!

No no cumpari dici mi l'ha t'ha i accattari.

Allura si misi: Passiccà! Passicca! Aggrampà ddra coscia di vò e si la carricà e la purtà nni la cummari.

La cummari la cucia.

Lu Re spertu: Ora ci mannammu 'na vecchia a ddumannari paisi paisi, videmmu si 'sta vecchia la trova 'sta carni.

Piglià c'era una: Cummà chi ffa mi la fa la limosina?

Sa veni cca ca ci dugnu tecchia di carni.

Chiddra avia lu bullu, c'avia di bullari la porta.

Allura piglia e ci la detti; ostramenti chiddra si la manciava casda casda, comu 'ntisi ca vinia lu cumpari, dici: Nisciti nisciti!

E ci bullà la porta.

Comu chiddru vitti ca ci bullà la porta, piglia ddru bullu e cumincià a fari pitipò pitipompi pitipò pitipompiti, e bullà mezzu paisi!

Lu putianu truvari un n'ecchi era lu primu, unni lu pottiru truvari!?

Dici: Ma ora sapi ca ma fari? -lu Re.

Ora dici a mma piglià 'ssu mortu l'ha mma purtà a la chiesa, s'avà canusci, dici. Allura la muglieri dici: I c'è i a la missa, I c'è i a la missa, I c'è i a la missa!

Chiddru un mulia.

Chistu sa chi fici? A la notti i a la chiesa dici e ci dissi: M'ha tà parà dici la chiesa stanotti, tutta ca i vi pagu. -Chiddru cu ddri sordi- Cci pararu la chiesa tutta pulita.

Comu lu nnumani lu cunnucianu strata strata la muglieri comu vitti lu maritu: Oh maritu miu! Iddru figliu di buttiglia spertu si taglia un itu, comu si taglià lu itu dissiru: Cca è la muglieri di lu mortu!

E iddru: Me muglieri grida ca mi scramuzzavu lu itu cu lu marteddru. - e ssi la fici franca.

Allura po' a la chiesa. Cummà 'ssu mortu è iè livari, piglia n'apocu di crapi e cu li corna ddra intra!

Quannu cu li zzagareddri russi parianu tutti diavuli li surdati sdettiru lassanu lu mortu e si nni ieru.

Comu si nni ieru chiddru si carricà lu mortu e lu i a ittà a mari

I nni la cummari: Cummà dici ssi sordi vi li tiniti ca i me iri a maritari.

Lu Re dici ma cu iè 'stu diavulu? S'è schettu, dici, cci dammu a mme figlia, s'è maritatu ci dammu 'na quantità di sordi.

Chiddru era schettu e ssi piglià la figlia di lu Re. Comu si piglià la figlia di lu Re nni pottiru spenni cosi -chibbò c'avianu a spenni ciciri?

Nni spinneru cosi! Fina ca spinneru sordi, spinneru du tarì: unu lu persi, l'atru mi cadì!