LU ZZU BIRRITTINU Si cunta e s'arraccunta ca c'era 'na vota lu zzu Birrittinu ca vinni a llassari n'apocu di scalora cà a Lisciannira e vitti du latri. Appena si nnaddunà ci misi du sordi 'n culu a lu sceccu. Chiddri latri arrivata a la Cattiva lu firmaru: Comu vi chiamati? Zzu Birrittinu. O nni dati li sordi o v'ammazzammu! A i chi haiu sordi, i 'ssu sciccareddru miu mi duna a manciari! A comu vi duna a manciari? Ci cafuddrà 'na puntariddrata: pum un sordu; n'atra puntariddrata natru sordu e cacà ddri sordi. N'avia cchiu sordi, un n'avia cchiu. Va quantu nni vuliti? Quattrucent'unzi. Ci dettiru quattrucent'unzi e si nni vinnuru. Viditi ca ci nna ta ddari scalora na chiddra! Ieru nni li muglieri e unu ci dissi: Va piglia la cutra di lu 'ngaggiu ca nna va cacà li sordi! Comu piglià ddra cutra di lu ngaggiu, ddru sceccu cu du puntariddrati: trtrtrtr trtrtrtr, e ci 'nchiappà tutta la casa e tutta la cutra! La muglieri chi ittava vuci: Mi cunzumavu, mi cunzumavu! Allura ieru nni l'atra cummari: Cummà ah quantu sordi cacà! Assà ci ni dastivu scalora? Cinquanta mazzi! E i ci nni dugnu sissanta! Comu ci detti ddra scalora e ddri puntariddrati si misi a cacari! Cumpà a viditica merda caca! A nni mia vidè! Ora a mma iri a Bivona ammazzari lu zzu Birrittinu. Si parteru pi iri a mmazzari lu zzu Birrittinu. Lu zzu Birrittinu, furbu, ca lu sapia: Ora a nna bbiniri l'amici di Lisciannira, a la muglieri ci dissi. Tal'è ca mma fari, dici, accattammu du cuniglia tutti du li stessi, tu comu vennu iddri cca ci dici: A cuniglieddra mia, va chiama lu zzu Birrittinu, ca i mi trovu a li calarii. Accattaru du cuniglia, una si la misi intra e una si purtà lu zzu Birrittinu a la muntata di San Lunardu. Lu zzu Birrittinu chiuvia.. Arrivaru chiddri du: Unn'è lu zzu Birrittinu? Amici mii siditi ca ora un mumentu lu mannu a chiamu: Cuniglieddra mia, dici, va chiama lu zzu Birrittinu e ci dici ca l'amici l'havi cca. Ddra cuniglieddra, arrivata davanti la porta si la manciaru! E arrivà lu zzu Birrittinu cu l'atra cuniglia. Ah tutta vagnata è la cuniglia, chi cci facisti nesciri?! Bah zzu Birrittì, 'ssa cuniglia nn'ata bbinni. A chi siti foddri, i figgli unn'aiu! No no, nni la ta bbinni ca n'atri mancu n'avemmu figli. N'atri quattrucent'unzi. E si nni ieru Unu ci dissi: Cumpà mi la pigliu i? Arrivata intra ci dissi a la muglieri: Metti la pignata, cala la pasta e mi manni a chiami. Comu calà la pasta lassa iri ddra cuniglia, cu fu si la mancià, era mezzannotti ancora senza viniri ddru cumpari! A comu finì? A i 'un ti la mannavu la cuniglia? A buttana di la maiddra, ora l'ha mma i ammazzari! Cumpà ora veru l'amma iri ammazzari. Veru? Veru! Allura lu zzu Birrittinu ci dissi a la muglieri: Vidica dici annà viniri ddr'amici mii, coci 'na pignata di carni e nni pripari n'atra cruda, tutti du aguali. Appena arrivau: E amici mii?! E zzu Birrittinu! Adà pigliammu un masticuni, pò arraggiunammu -lu zzu Birrittinu- Pizzia ddra carni, ci dissi a la mugglieri! Pizzià ddra carni, tinchi tinchi, cu un cirinu, tira lu cuperchiu, la carni era cotta!-accura l'avia cuciutu prima! Bah zzu Birrittì, vinnitini 'ssa pignata. No no, i cu un cirinu. No no, nni la ta dari; natri quattrucent'unzi. Arrivata intra cuminciaru a pizziari carni, 'na scatula di cirina e sempri ddra carni cruda. Cumpà iemmulu ammazzari lu zzu Birrittinu, ca nni nni futti sordi, dici! Lu zzu Birrittinu, spertu, ci dissi a la muglieri: Tal'è dumani annà vinì l'amici di Lisciannira, va nni lu vucceri e ti fà inchiri 'na bussica di sangu. Vabbeni. Comu arrivaru l'amici: Attia, porca maiddra, chi canciansti pignata! ..pum!...cu lu cuteddru. Ah ah -la muglieri- e murì! Zzu Birrittinu,vi cunzumastivu. Lassatila stari 'ssa disgraziata! Com'è cussì, piglià ddru friscalettu: Tirolololollolò... Chiddra si susi e cumencia a ballari! Eh, zzu Birrittinnu, 'ssu friscalettu n'a ta binni e 'ssu cuteddru. Ma chi siti pazzi, no ca i cu me muglieri sugnu abbiliusu, un mumentu l'ammazzu e un mumentu annivisci. Allura ci vinnì ddru cuteddru e dru friscalettu. Arrivà lu primu intra: Attia cucisti? Ma s'un viniatu tu comu avia di coci! Tum 'na cutiddrata e muri pi ddaveru! Tirololollolò. Quali lolò... Ci i lu cumpari: Comu finì. Tinì, misca abballa me muglieri! Arrivà intra: La cucisti la pasta? Ma s'un viniatu tu comu avia di coci! Ci cafuddrà 'na cutiddrata e muri vidè. Misca ora veru l'ammà i ammazzari a lu zzu Birrittinu! Lu zzu Birrittinu furbu. ci di ssi a la muglieri: Coci la carni ca iddri a lu matinu annà vinì ca hannu li muglieri morti, dici, coci la carni, a iddri cu l'ogliu di ricinu, ca ci doli lu stomacu, a n'atri no. Allura 'na pignata cotta cu l'ogliu di ricinu e l'atra no. Zzu Birrittì, a stu viaggiu v'a mma mazzari! A comu diciti vatri, ma però vogliu fattu un favuri ca m'a tà nfilà intra lu saccu, ca i accussi un ci vegnu; taliati cca, me muglieri avi cotta 'na pignata di carni, ammazzannu a mia cu si l'a va mancià? Si manciaru ddra carni, comu si manciaru ddra carni, arrivata a lu ponti, ad unu Ahi ahi ahi. Ci vinni di sciogli lu stomacu e si nni i sutta lu ponti. A l'atru vidè. E lassaru lu zzu Birrittinu 'ncapu lu ponti ca dicia: 'Un ni la vogliu la figlia di lu Re orbu d'un occhiu, 'un ni la vogliu la figlia di lu Re orbu d'un occhiu? Passà un picuraru c'avia du pecuri e un muteddru e n'apocu di purciddruzza e dici: Amicu, pirchì? Ca mi vonnu dari a la figlia di lu Re orbu d'un occhiu e un nni la vogliu! 'Nfilatici a mia: I la vogliu la figlia di lu Re orba d'un occhiu! I la vogliu la figlia di lu Re orba d'un occhiu! Talè lu zzu Birrittinu a la figlia di lu Re voli, orba d'un occhiu! Si lu carricaru e lu purtaru a mari. Dppu tanticchia vittiru lu zzu Birrittinu ca cantava: Chiù c'annintra mi ittava chiossà pecuri pigliava! Chiù c'annintra mi ittava chiossà pecuri pigliava! Zzu Birritti a comu fini? A babbi, v'atri mi lassastivu davanti davanti e pigliavu sti purcidduzza e sti picureddri, a si mi ittavavu cchiù ann'intra a n'avia di pigliari 'na chiddra! Vinitici a ittari a n'atri. E ci i a ittari a iddri! Pe' piglia li vo! Pe piglia li tauri!...E annigaru... Arriturnà lu zzu Birrittinu e tutti chiamavanu: Zza Maria sò maritu vinni! A si me maritu è mortu! Sò maritu vinni cu li pecuri. Ah babba, a c'avia di muriri i, iddri mureru! Iddri ristaru filici e cuntenti e n'atri cca senza fari nenti! Lu cuntu è lestu lu cuntu è finutu, un sacciu si a vatri v'ha piaciutu! Favola ditta favola scritta, cuntati la vostra ca la mia è ditta. |